ದೇಶಾದ್ಯಂತ ಆಕ್ಟಿವ್ ಆಗಿದೆ ನಕಲಿ ಔಷಧ ತಯಾರಿಕಾ ಜಾಲ,ಬೆಂಗಳೂರಿನಲ್ಲಿ ನಕಲಿ ಔಷಧ ತಯಾರಿಕಾ ಜಾಲ ಪತ್ತೆ

ಬೆಂಗಳೂರು: ಬೆಂಗಳೂರಿನ ಸಮೀಪ ಪತ್ತೆಯಾದ ನಕಲಿ ಔಷಧ ತಯಾರಿಕಾ ಜಾಲದ ನಂಟು ದೇಶದ ಹಲವು ರಾಜ್ಯಗಳಿಗೆ ವಿಸ್ತರಿಸಿರುವ ಶಂಕೆ ವ್ಯಕ್ತವಾಗಿದ್ದು, ಔಷಧ ನಿಯಂತ್ರಣ ಇಲಾಖೆ ತನಿಖೆಯನ್ನು ಮತ್ತಷ್ಟು ಚುರುಕುಗೊಳಿಸಿದೆ. ಕರ್ನಾಟಕದ ಔಷಧ ನಿಯಂತ್ರಣ ಇಲಾಖೆ ನೀಡಿದ ಮಾಹಿತಿಯ ಆಧಾರದ ಮೇಲೆ ದೇಶದ ಎಲ್ಲ ರಾಜ್ಯಗಳ ಔಷಧ ನಿಯಂತ್ರಕರು ಹಾಗೂ ರಾಜ್ಯ ಪರವಾನಗಿ ಪ್ರಾಧಿಕಾರಗಳಿಗೆ ಎಚ್ಚರಿಕೆ ನೀಡಲಾಗಿದೆ.

ಆಗಸ್ಟ್ 18ರಂದು ಕರ್ನಾಟಕದ ಡ್ರಗ್ ಎನ್‌ಫೋರ್ಸ್‌ಮೆಂಟ್ ವಿಂಗ್ ಬಿದದಿ ಸಮೀಪದ ನಂ.34 ಕುರುಬರಹಳ್ಳಿ ಗ್ರಾಮದ ಲೈಸೆನ್ಸ್‌ರಹಿತ ಔಷಧ ತಯಾರಿಕಾ ಘಟಕದ ಮೇಲೆ ದಾಳಿ ನಡೆಸಿತ್ತು. ದಾಳಿ ವೇಳೆ ನಕಲಿ ಔಷಧಗಳು, ಬಲ್ಕ್ ಸ್ಟಾಕ್, ಪ್ಯಾಕೇಜಿಂಗ್ ಯಂತ್ರಗಳು, ಖಾಲಿ ವಯಲ್‌ಗಳು ಹಾಗೂ ನಕಲಿ ಲೇಬಲ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ವಶಪಡಿಸಿಕೊಂಡ ವಸ್ತುಗಳ ಒಟ್ಟು ಅಂದಾಜು ಮೌಲ್ಯ ₹5,05,49,575 ಎಂದು ತಿಳಿದುಬಂದಿದೆ.

ಮುಂಬೈ, ತೆಲಂಗಾಣ, ಹಿಮಾಚಲ ಪ್ರದೇಶಕ್ಕೂ ನಂಟು?

ಬೆಂಗಳೂರಿನಿಂದ ಮುಂಬೈ, ತೆಲಂಗಾಣ ಹಾಗೂ ಹಿಮಾಚಲ ಪ್ರದೇಶ ಸೇರಿದಂತೆ ಹಲವು ರಾಜ್ಯಗಳ ನಡುವೆ ನಕಲಿ ಔಷಧ ಜಾಲದ ಸಂಪರ್ಕ ಇರುವ ಸಾಧ್ಯತೆಯ ಬಗ್ಗೆ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ. ತೆಲಂಗಾಣ ಮತ್ತು ಹಿಮಾಚಲ ಪ್ರದೇಶದ ಮ್ಯಾನುಫ್ಯಾಕ್ಚರಿಂಗ್ ಹಬ್‌ಗಳಿಂದ ಕಡಿಮೆ ಬೆಲೆಯ ಜೆನೆರಿಕ್ ಔಷಧಗಳನ್ನು ಪಡೆದು, ಕರ್ನಾಟಕದ ಲೈಸೆನ್ಸ್‌ರಹಿತ ಘಟಕದಲ್ಲಿ ಅವುಗಳನ್ನು ಹೊಸ ವಯಲ್‌ಗಳಿಗೆ ತುಂಬಿ ನಕಲಿ ಲೇಬಲ್ ಅಂಟಿಸಲಾಗುತ್ತಿತ್ತೆಂಬ ಶಂಕೆ ವ್ಯಕ್ತವಾಗಿದೆ.

ನಂತರ ಈ ಔಷಧಗಳನ್ನು ದುಬಾರಿ ಆಮದು ಔಷಧಗಳಂತೆ ಮಾರಾಟ ಮಾಡಲಾಗುತ್ತಿತ್ತೆಂಬ ಕೋನದಲ್ಲೂ ತನಿಖೆ ನಡೆಯುತ್ತಿದೆ.

ಎಲ್ಲಾ ರಾಜ್ಯಗಳಿಗೂ ಎಚ್ಚರಿಕೆ

ಪ್ರಕರಣ ಅಂತರರಾಜ್ಯ ಮಟ್ಟದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಶಂಕೆ ಹಿನ್ನೆಲೆಯಲ್ಲಿ ಕರ್ನಾಟಕದ ಔಷಧ ಗುಣಮಟ್ಟ ಇಲಾಖೆ ದೇಶದ ಎಲ್ಲ ರಾಜ್ಯಗಳ ಔಷಧ ನಿಯಂತ್ರಕರಿಗೆ ಪತ್ರ ಬರೆದಿದೆ. ಅನುಮಾನಾಸ್ಪದ ಲೇಬಲಿಂಗ್ ಹೊಂದಿರುವ ಔಷಧಗಳು ಅಥವಾ ಕರ್ನಾಟಕದಲ್ಲಿ ನಿಷೇಧಿಸಿರುವ ಬ್ಯಾಚ್‌ಗಳ ಔಷಧಗಳು ತಮ್ಮ ರಾಜ್ಯಗಳಲ್ಲಿ ಪತ್ತೆಯಾದರೆ ಕೂಡಲೇ ಮಾಹಿತಿ ನೀಡುವಂತೆ ಸೂಚಿಸಲಾಗಿದೆ.

ಖಾಸಗಿ ಆಸ್ಪತ್ರೆಗಳು, ಮೆಡಿಕಲ್ ಸ್ಟೋರ್‌ಗಳು ಹಾಗೂ ಔಷಧ ವಿತರಕರಿಗೂ ಎಚ್ಚರಿಕೆ ನೀಡಲಾಗಿದ್ದು, ನಿಷೇಧಿತ ಬ್ಯಾಚ್‌ಗಳ ಔಷಧಗಳು ಬಳಕೆಯಾಗುತ್ತಿವೆಯೇ ಎಂಬುದನ್ನು ಪರಿಶೀಲಿಸುವಂತೆ ಸೂಚಿಸಲಾಗಿದೆ.

ಅಪರ ಔಷಧ ನಿಯಂತ್ರಕ ಡಾ. ಉಮೇಶ್ ಅವರ ಮಾಹಿತಿಯಂತೆ, ಪ್ರಮುಖ ಹೋಲ್‌ಸೇಲ್ ಔಷಧ ಮಾರುಕಟ್ಟೆಗಳು, ಡಿಸ್ಟ್ರಿಬ್ಯೂಷನ್ ಹಬ್‌ಗಳು ಹಾಗೂ ರಿಟೇಲ್ ಮೆಡಿಕಲ್ ಶಾಪ್‌ಗಳಲ್ಲಿ ದಿಢೀರ್ ತಪಾಸಣೆ ನಡೆಸಲು ಅಧಿಕಾರಿಗಳಿಗೆ ಸೂಚಿಸಲಾಗಿದೆ.

Pfizer ಹೆಸರಿನಲ್ಲಿ ನಕಲಿ ಔಷಧ?

ವಿಶೇಷವಾಗಿ Pfizer Ltd. ಹೆಸರಿನಲ್ಲಿ ಅನುಮಾನಾಸ್ಪದ ಅಥವಾ ದಾಖಲೆಗಳಿಲ್ಲದ ಔಷಧ ಸ್ಟಾಕ್ ಇದೆಯೇ ಎಂಬುದನ್ನು ಪರಿಶೀಲಿಸಲು ಸೂಚಿಸಲಾಗಿದೆ. ದುಬಾರಿ ಔಷಧಗಳನ್ನು ಮಾರಾಟ ಮಾಡುವ ಡಿಸ್ಟ್ರಿಬ್ಯೂಟರ್‌ಗಳ Purchase Invoice, Batch Records ಹಾಗೂ ಔಷಧದ ಮೂಲಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಪರಿಶೀಲಿಸಲಾಗುತ್ತಿದೆ.

ದಾಳಿಯ ವೇಳೆ ಬಹುರಾಷ್ಟ್ರೀಯ ಔಷಧ ಕಂಪನಿಗಳ ಹೆಸರನ್ನು ಬಳಸಿಕೊಂಡು ಸಿದ್ಧಪಡಿಸಲಾಗಿದ್ದ ನಕಲಿ ಔಷಧಗಳು ಪತ್ತೆಯಾಗಿವೆ. ವಿಶೇಷವಾಗಿ Pfizer Ltd. ಹೆಸರಿನಲ್ಲಿ ನಕಲಿ ಔಷಧಗಳನ್ನು ಸಿದ್ಧಪಡಿಸಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವಶಪಡಿಸಿಕೊಂಡ ವಸ್ತುಗಳಲ್ಲಿ Aztreonam-Avibactam – EMBLAVEO, Ceftazidime & Avibactam Injection – CEFIAVIGE NT-2.5, Tigecycline for Injection USP – TIGYNT ಹಾಗೂ Midazolam Injection HIZLAM 2 ಸೇರಿದಂತೆ ವಿವಿಧ ಔಷಧಗಳಿವೆ.

ಇದರ ಜೊತೆಗೆ Ceftazidime + Avibactam ಹೆಸರಿನ ಖಾಲಿ ವಯಲ್‌ಗಳು ಹಾಗೂ Zavicefta, Xavitaz, Trezam, AztraQ ಸೇರಿದಂತೆ ವಿವಿಧ ಬ್ರ್ಯಾಂಡ್‌ಗಳ ನಕಲಿ ಲೇಬಲ್‌ಗಳೂ ಪತ್ತೆಯಾಗಿವೆ.

ಕ್ಯಾನ್ಸರ್ ಔಷಧಗಳೂ ಗುರಿ?

ಈ ಜಾಲದಲ್ಲಿ ಕ್ಯಾನ್ಸರ್ ಸೇರಿದಂತೆ ಗಂಭೀರ ಕಾಯಿಲೆಗಳ ಚಿಕಿತ್ಸೆಯಲ್ಲಿ ಬಳಸುವ ದುಬಾರಿ ಇಂಜೆಕ್ಷನ್‌ಗಳೂ ಗುರಿಯಾಗಿರುವುದು ಆತಂಕಕ್ಕೆ ಕಾರಣವಾಗಿದೆ. ನಕಲಿ ಔಷಧಗಳು ರೋಗಿಗಳ ಆರೋಗ್ಯ ಹಾಗೂ ಜೀವಕ್ಕೆ ಗಂಭೀರ ಅಪಾಯ ಉಂಟುಮಾಡುವ ಸಾಧ್ಯತೆ ಹಿನ್ನೆಲೆಯಲ್ಲಿ ಆಸ್ಪತ್ರೆಗಳು, ವೈದ್ಯರು ಹಾಗೂ ಫಾರ್ಮಸಿಗಳಿಗೆ ವಿಶೇಷ ಎಚ್ಚರಿಕೆ ನೀಡಲಾಗಿದೆ.

ಆಂಕಾಲಜಿಸ್ಟ್‌ಗಳು ಹಾಗೂ ಫಾರ್ಮಸಿಗಳು ದುಬಾರಿ ಆಮದು ಔಷಧಗಳ ಪ್ಯಾಕೇಜಿಂಗ್‌ನ Authenticity Features ಪರಿಶೀಲಿಸುವಂತೆ ಸೂಚಿಸಲಾಗಿದೆ. ಅನುಮಾನಾಸ್ಪದ ಪ್ಯಾಕೇಜಿಂಗ್, ಬ್ಯಾಚ್ ದಾಖಲೆಗಳ ಕೊರತೆ ಅಥವಾ ಔಷಧದ ಮೂಲದ ಬಗ್ಗೆ ಅನುಮಾನವಿರುವ ಸ್ಟಾಕ್ ಕಂಡುಬಂದರೆ ತಕ್ಷಣ ಅಧಿಕಾರಿಗಳಿಗೆ ಮಾಹಿತಿ ನೀಡುವಂತೆ ನಿರ್ದೇಶಿಸಲಾಗಿದೆ.

ಬಿದದಿ ಸಮೀಪದ ಘಟಕದಲ್ಲಿ ಔಷಧಗಳ ನಕಲಿ ತಯಾರಿಕೆಯಷ್ಟೇ ಅಲ್ಲದೆ, ಅವುಗಳಿಗೆ ನಕಲಿ ಪ್ಯಾಕೇಜಿಂಗ್ ಮತ್ತು ಲೇಬಲಿಂಗ್ ಮಾಡುವ ವ್ಯವಸ್ಥೆಯೂ ಇತ್ತು ಎಂಬ ಅನುಮಾನ ಬಲಗೊಂಡಿದೆ.

ಪ್ರಕರಣದ ತನಿಖೆ ಮುಂದುವರಿದಿದ್ದು, ದೇಶದ ವಿವಿಧ ರಾಜ್ಯಗಳಲ್ಲಿ ಮಾರುಕಟ್ಟೆ ತಪಾಸಣೆ ನಡೆಸಿ ವರದಿ ಹಾಗೂ ಮಾಹಿತಿಯನ್ನು ಪರಸ್ಪರ ಹಂಚಿಕೊಳ್ಳುವಂತೆ ಸೂಚಿಸಲಾಗಿದೆ. ನಕಲಿ ಔಷಧ ಜಾಲದ ಸಂಪೂರ್ಣ ಸಂಪರ್ಕವನ್ನು ಪತ್ತೆಹಚ್ಚಲು ಔಷಧ ನಿಯಂತ್ರಣ ಇಲಾಖೆ ಸಮನ್ವಯಿತ ಕಾರ್ಯಾಚರಣೆಗೆ ಮುಂದಾಗಿದೆ.