ಗ್ಯಾಸ್ ಗೀಸರ್ ದುರಂತ: ನಾಲ್ವರು ಮೃತ್ಯು

ಮುಂಬೈ/ ಗಾಜಿಯಾಬಾದ್: ಹೋಳಿ ಹಬ್ಬದ ದಿನವಾದ ಬುಧವಾರ ಸಂಭವಿಸಿದ ಎರಡು ಪ್ರತ್ಯೇಕ ಘಟನೆಗಳಲ್ಲಿ ಗ್ಯಾಸ್ ಗೀಸರ್‌ನಿಂದ‌ ಅನಿಲ ಸೋರಿಕೆಯಾಗಿ ಮುಂಬೈ ಮತ್ತು ಗಾಜಿಯಾಬಾದ್‌ನಲ್ಲಿ ನಾಲ್ವರು‌ ಮೃತಪಟ್ಟಿದ್ದಾರೆ.

ಎರಡೂ ಜೋಡಿ (ದಂಪತಿ) ತಮ್ಮ ಬಾತ್‌ರೂಮ್‌ನಲ್ಲಿ ಶವವಾಗಿ ಪತ್ತೆಯಾಗಿದೆ. ಅವರ ಸಾವಿಗೆ ಗೀಸರ್ ಗ್ಯಾಸ್ ಸೋರಿಕೆ ಕಾರಣ ಎಂದು ಶಂಕಿಸಲಾಗಿದೆ. ಮುಂಬೈನ ಘಾಟ್‌ಕೋಪರ್‌ನಲ್ಲಿ ದೀಪಕ್ ಮತ್ತು ಟೀನಾ ಶಾ ಅವರ ಮೃತದೇಹಗಳನ್ನು ಅವರ ಸಂಬಂಧಿಕರು ಪತ್ತೆ ಮಾಡಿದ್ದಾರೆ. ಗಾಜಿಯಾಬಾದ್‌ನ ಮುರಾದ್‌ನಗರದಲ್ಲಿ ದೀಪಕ್ ಮತ್ತು ಶಿಲ್ಪಿ ಮೃತಪಟ್ಟಿದ್ದು, ಅವರ ಮಕ್ಕಳು ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.