ಕೆಎಸ್ಆರ್‌ಟಿಸಿ ಮಾಸಿಕ ಬಸ್ ಪಾಸ್ ದರ ಭಾರಿ ಏರಿಕೆ,ಕಂಗಾಲಾದ ಪ್ರಯಾಣಿಕರು

ಬೆಂಗಳೂರು: ಬಿಎಂಟಿಸಿ ಮಾಸಿಕ ಪಾಸ್ ದರ ಏರಿಕೆಯ ಬೆನ್ನಲ್ಲೇ ಇದೀಗ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ (ಕೆಎಸ್ಆರ್‌ಟಿಸಿ) ಕೂಡ ಮಾಸಿಕ ಬಸ್ ಪಾಸ್ ದರವನ್ನು ಹೆಚ್ಚಿಸಿ ಆದೇಶ ಹೊರಡಿಸಿದೆ. ಗ್ರಾಮಾಂತರ ಭಾಗದ ವೇಗದೂತ, ತಡೆರಹಿತ ಹಾಗೂ ಸಾಮಾನ್ಯ ಬಸ್‌ಗಳ ಮಾಸಿಕ ಪಾಸ್‌ಗಳ ಜತೆಗೆ ಪ್ರಮುಖ ನಗರಗಳ ನಗರ ಸಾರಿಗೆ ಬಸ್ ಪಾಸ್ ದರವನ್ನೂ ಪರಿಷ್ಕರಿಸಲಾಗಿದೆ. ಇದರಿಂದ ನಿತ್ಯ ಬಸ್‌ಗಳಲ್ಲಿ ಪ್ರಯಾಣಿಸುವ ನೌಕರರು, ವಿದ್ಯಾರ್ಥಿಗಳು ಹಾಗೂ ಹಿರಿಯ ನಾಗರಿಕರಿಗೆ ಹೆಚ್ಚುವರಿ ಆರ್ಥಿಕ ಹೊರೆ ಬೀಳಲಿದೆ.

ವೇಗದೂತ ಮತ್ತು ತಡೆರಹಿತ ಬಸ್‌ಗಳಲ್ಲಿ ಒಟ್ಟು 20 ಹಂತಗಳು ಹಾಗೂ ಸಾಮಾನ್ಯ ಬಸ್‌ಗಳಲ್ಲಿ 10 ಹಂತಗಳ ಆಧಾರದ ಮೇಲೆ ಮಾಸಿಕ ಪಾಸ್ ವಿತರಿಸಲಾಗುತ್ತದೆ. ಪರಿಷ್ಕೃತ ದರಗಳ ಪ್ರಕಾರ ಕನಿಷ್ಠ ಹಾಗೂ ಗರಿಷ್ಠ ಹಂತದ ಪಾಸ್ ದರಗಳಲ್ಲಿ ಗಣನೀಯ ಏರಿಕೆಯಾಗಿದೆ.

ವೇಗದೂತ ಮತ್ತು ತಡೆರಹಿತ ಬಸ್‌ಗಳ ಪಾಸ್ ದರ

• ಕನಿಷ್ಠ ಹಂತ: ಸಾಮಾನ್ಯ ಪ್ರಯಾಣಿಕರಿಗೆ 520 ರೂ. ಇದ್ದ ದರ 640 ರೂ.ಗೆ ಏರಿಕೆಯಾಗಿದೆ. ಹಿರಿಯ ನಾಗರಿಕರಿಗೆ 465 ರೂ. ಇದ್ದ ದರ 570 ರೂ.ಗೆ ಹೆಚ್ಚಳವಾಗಿದೆ.
• ಗರಿಷ್ಠ ಹಂತ: ಸಾಮಾನ್ಯ ಪ್ರಯಾಣಿಕರಿಗೆ 3,220 ರೂ. ಇದ್ದ ದರ 3,960 ರೂ.ಗೆ ಏರಿಕೆಯಾಗಿದೆ. ಹಿರಿಯ ನಾಗರಿಕರಿಗೆ 2,900 ರೂ. ಇದ್ದ ದರ 3,570 ರೂ.ಗೆ ಹೆಚ್ಚಳವಾಗಿದೆ.

ಸಾಮಾನ್ಯ ಬಸ್‌ಗಳ ಪಾಸ್ ದರ

• ಕನಿಷ್ಠ ಹಂತ: ಸಾಮಾನ್ಯ ಪ್ರಯಾಣಿಕರಿಗೆ 460 ರೂ. ಇದ್ದ ದರ 570 ರೂ.ಗೆ ಏರಿಕೆಯಾಗಿದೆ. ಹಿರಿಯ ನಾಗರಿಕರಿಗೆ 415 ರೂ. ಇದ್ದ ದರ 510 ರೂ.ಗೆ ಹೆಚ್ಚಳವಾಗಿದೆ.
• ಗರಿಷ್ಠ ಹಂತ: ಸಾಮಾನ್ಯ ಪ್ರಯಾಣಿಕರಿಗೆ 2,070 ರೂ. ಇದ್ದ ದರ 2,550 ರೂ.ಗೆ ಏರಿಕೆಯಾಗಿದೆ. ಹಿರಿಯ ನಾಗರಿಕರಿಗೆ 1,865 ರೂ. ಇದ್ದ ದರ 2,290 ರೂ.ಗೆ ಹೆಚ್ಚಳವಾಗಿದೆ.

ನಗರ ಸಾರಿಗೆ ಮಾಸಿಕ ಪಾಸ್ ದರವೂ ಹೆಚ್ಚಳ

ಮೈಸೂರು, ಮಂಗಳೂರು, ಹಾಸನ ಹಾಗೂ ತುಮಕೂರು ನಗರ ಸಾರಿಗೆ ಬಸ್‌ಗಳ ಮಾಸಿಕ ಪಾಸ್ ದರವನ್ನೂ ಪರಿಷ್ಕರಿಸಲಾಗಿದೆ.

ಈಗಾಗಲೇ ಟಿಕೆಟ್ ದರ ಏರಿಕೆಯಿಂದ ತೊಂದರೆ ಅನುಭವಿಸುತ್ತಿರುವ ಸಾರ್ವಜನಿಕರಿಗೆ ಮಾಸಿಕ ಪಾಸ್ ದರ ಹೆಚ್ಚಳ ಮತ್ತಷ್ಟು ಹೊರೆಯಾಗಿದೆ. ನಿತ್ಯ ಬಸ್ ಪ್ರಯಾಣವನ್ನೇ ಅವಲಂಬಿಸಿರುವ ಉದ್ಯೋಗಿಗಳು, ವಿದ್ಯಾರ್ಥಿಗಳು ಹಾಗೂ ಹಿರಿಯ ನಾಗರಿಕರ ಮಾಸಿಕ ಪ್ರಯಾಣ ವೆಚ್ಚ ಹೆಚ್ಚಾಗಲಿದ್ದು, ದರ ಏರಿಕೆಯ ಕುರಿತು ಪ್ರಯಾಣಿಕರಿಂದ ಅಸಮಾಧಾನ ವ್ಯಕ್ತವಾಗುತ್ತಿದೆ.