ರೆಡ್‌ ಕಾರ್ಪೆಟ್ ಇಲ್ಲದ ಆಸ್ಕರ್‌! 60 ವರ್ಷಗಳ ಬಳಿಕ ಮೊದಲ ಬಾರಿಗೆ ಹೊಸ ಬದಲಾವಣೆ

ವಾಷಿಂಗ್ಟನ್‌: ಪ್ರತಿಷ್ಠಿತ ಆಸ್ಕರ್‌ ಅಕಾಡೆಮಿ ಪ್ರಶಸ್ತಿಯು 60 ವರ್ಷಗಳಲ್ಲೇ ಮೊದಲಬಾರಿಗೆ ಹೊಸ ಬದಲಾವಣೆಯೊಂದಕ್ಕೆ ತೆರೆದುಕೊಂಡಿದ್ದು,ಈ ಬಾರಿ ಸಮಾರಂಭದಲ್ಲಿ ರೆಡ್‌ ಕಾರ್ಪೆಟ್ ಬದಲಿಗೆ ಶಾಂಪೇನ್‌ ಕಾರ್ಪೆಟ್ ಕಂಗೊಳಿಸಲಿದೆ. 1961ರಲ್ಲಿ ಪ್ರಶಸ್ತಿ ಸಮಾರಂಭ ಶುರುವಾದಗಿನಿಂದ ಈ ವರೆಗೆ ಅನೇಕ ಬದಲಾವಣೆಗಳನ್ನು ಮಾಡಲಾಗಿದೆಯಾದರೂ, ರೆಡ್‌ ಕಾರ್ಪೆಟ್ ಮಾತ್ರ ಪ್ರತಿವರ್ಷವೂ ಮುಂದುವರಿದಿತ್ತು.ಆದರೆ, ಈ ವರ್ಷ ಖ್ಯಾತ ಸಲಹೆಗಾರರಾದ ಲೀಸಾ ಲವ್‌ ಹಾಗೂ ರೌಲ್‌ ಅವಿಲಾ ಅವರ ಸಲಹೆ ಮೇರೆಗೆ ಕಾರ್ಪೆಟ್ ಬಣ್ಣ ಬದಲಿಸಲು ನಿರ್ಧರಿಸಲಾಗಿದೆ. ಬ್ಲಾಕ್‌ ಟೈ ಡ್ರೆಸ್‌ಕೋಡ್‌ಗೆ ಈ ಬಾರಿ ಕಾರ್ಪೆಟ್ ಸೂಕ್ತವಾಗಿರಲಿದೆ. ಮುಂದಿನ ಬಾರಿ ಮತ್ತೂಂದು ಬದಲಾವಣೆ ಆಗಬಹುದು ಎಂದು ಲೀಸಾ ಲವ್‌ ಹೇಳಿದ್ದಾರೆ. ಈ ಬಾರಿಯ 95ನೇ ಆಸ್ಕರ್‌ ಪ್ರಶಸ್ತಿ ಸಮಾರಂಭ ಭಾನುವಾರ ನಡೆಯಲಿದೆ. ಪ್ರಶಸ್ತಿ ಪ್ರದಾನ ಮಾಡುವವರ ಪೈಕಿ ಹಿಂದಿ ಚಲನಚಿತ್ರ ನಟಿ ದೀಪಿಕಾ ಪಡುಕೋಣೆ ಕೂಡ ಒಬ್ಬರಾಗಿದ್ದಾರೆ.